كفااااااية تفكير.......

بس بقى يا دماغي شوية مش عارفة اعيش منك ...كفاااااااية تفكير

بفتكر حاجات حصلت من كذا سنة ..حاجات بسيطة وتافهة ..بس مش بنساها ...حاجات عملتها وفرحت بيها ..طيب تمام الحمد لله ..المشكلة انها بتجر حاجات عملتها وندمت عليها .

طيب المهم دلوقتي انا مش عايزة افكر ..شوية بس ..ارتاح ..اخد نفس ..انام ساعة

انام ؟؟!!!!

اهي دي البلوة التانية ..اني حتى وانا نايمة بقت كل احلامي كوابيس .حتى في كوابيسي بفكر ..صراعات...صراعاااات

اللى بيصبرني ان حتى في الكوابيس بقاوم ..بفكر واتكتك واخطط ..بس مش بعرف انفذ ..بتردد وابدا افكر من جديد ..ولما باخد قرار في احلامي بندم عليه وبيتحول لكابووووس وتانيب ضمير

واول ما افوق من النوم اقول ..ايه الهبل ده ..ازاي اعمل كده في الحلم ..ازاي افكر كده ياريتني كنت فكرت بشكل مختلف يمكن مكونتش صحيت زعلانة ومكتئبة بالشكل الفظيع ده

بردو المشكلة مش في كل الكلام ده ..المشكلة ان مش عارفة اوقف دماغي عن التفكير دلوقتي ..مش عارفة اطلع التفكير ده في شكل فعل

رسمة ..كتابة ...اخد رد فعل ...طيب يا هبلة ما انتي بتكتبي اهو ..!!!

ايوة انا بكتب اني مش عايزة افكر ..لكن مكتبتش ايه اللى بفكر فيه ..ودي المشكلة ..مش عارفة اكتب اللى بفكر فيه و لا ارسمه ...طيب ايه رايكم انفذه ..

يا خبر ..دي تبقى كارثة ..هندم ..وهقول ليه فكرت كده كان المفروض افكر عكس كده ...لا .. كان المفروض مفكرش في الموضوع أصلا لأنه ميستاهلش

ااااااااه يا دماغي ..ابيات شعر ..اغنية لفيروز ..حوارات مع ناس ...حاجات كتير بتعلق معايا

على بالي دلوقتي قصيدة لا تهاجر لأحمد مطر : لا تهاجر
كل ما حولك غادر
لا تدع نفسك تدري بنواياك الدفينة
وعلى نفسك من نفسك حاذر

الله ينور عليك... وعلى نفسك من نفسك حاذر ..بالظبط كده ومفيش غير كده ولا بعد كده ...